Ísraelar einir grunaðir

Palestínumenn hafa Ísraela grunaða um morð á Jasser Arafat, sem lést haustið 2004, 75 ára gamall.

Svissneskir vísindamenn hafa rannsakað jarðneskar leifar Arafats og komist að þeirri niðurstöðu að líklega hafi hann látist af völdum póloneitrunar.

Tavfik Tíraví, aðalrannsakandi Palestínustjórnar í málinu, vildi ekki lýsa því afdráttarlaust yfir að póloneitrun hafi orðið Arafat að bana.

„Það skiptir ekki máli hér hvort ég segi að hann hafi verið myrtur með póloni,” sagði Tíraví á blaðamannafundi í morgun. „En ég segi, með hliðsjón af öllum þeim smáatriðum sem liggja fyrir um dauða Arafats, að hann hafi verið myrtur, og að Ísrael myrti hann.”

Á fundinum tók Tíraví fram að engir aðrir en Ísraelar séu grunaðir.

Þetta eru fyrstu opinberu viðbrögð Palestínumanna við skýrslunni, sem svissnesku vísindamennirnir sendu frá sér í gær.

Ísraelsstjórn hefur neitað því að hafa átt nokkurn þátt í dauða Arafats. Ísraelum hafi tekist að einangra Arafat pólitískt og ekki haft neina ástæðu til að ráða hann af dögum.

„Leyfið mér að segja það með eins einföldum hætti og mér er unnt: Ísrael varð Arafat ekki að bana,” sagði Jigal Palmor, talsmaður ísraelska utanríkisráðuneytisins, í morgun. „Palestínumenn ættu að hætta þessari vitleysu og hætta að koma með þessar tilhæfulausu ásakanir án minnstu sönnunar.”