Clapper segir nauðsynlegt að njósna um leiðtogana

Yfirmaður leyniþjónustumála í Bandaríkjunum segir það eitt af aðaláhersluatriðum bandarískra njósnara að komast að því hvað leiðtogar annarra ríkja hyggjast fyrir. Yfirmaðurinn, James Clapper, var kallaður á teppið hjá þingnefnd í fulltrúadeildinni í gær þar sem hann svaraði fyrir þær ásakanir að Bandaríkjamenn hafi síðustu misserin hlerað símana hjá fjölda þjóðarleiðtoga, þar á meðal hjá Angelu Merkel Þýskalandskanslara.

Clapper bætti því við að þó markmiðið væri að ná sem gleggstri mynd af fyrirætlunum annarra þjóða, ætti það þó ekki að þýða að hver sem er sé hleraður í tíma og ótíma.

Uppljóstrarinn Edward Snowden hefur þó einmitt sýnt fram á að milljónir símtala og tölvuskeyta hafa verið hleruð um allan heim, að því er virðist í tíma og ótíma.