Handskrifaði hjartnæm bréf meðan hann beið dauðans

Bandarískur fjölskyldufaðir, sem hafði verið saknað í einn og hálfan mánuð, eyddi síðustu dögum lífs síns fastur í bíl sínum sem hann hafði keyrt útaf. Þar handskrifaði hann hjartnæm bréf til eiginkonu sinnar og sona. Daily Mail segir frá.

Tilkynnt var um hvarf mannsins, David Welch 54 ára, 2. september en lögreglan fann lík hans 18. október. 

Talið er líklegt að David hafi sofnað undir stýri með þeim afleiðingum að hann keyrði útaf. Hann sat síðan fastur í bílnum en ekki er vitað hversu lengi hann lifði. En að minnsta kosti í einhverja daga ef ekki vikur ef mið er tekið af bréfunum sem hann skrifaði til fjölskyldu sinnar.

Bíllinn sást ekki frá veginum og því leið svo langur tími þar til hann fannst. Það var puttaferðalangur sem kom auga á bílinn þegar hann var á ferð á þar um.

Fjölskyldan vill ekki gera bréfin sem hann skrifaði opinber. Ekki er vitað á hvaða ferðalagi maðurinn var. Hann lagði af stað í síðasta bíltúrinn sinn án þess að greina fjölskyldunni frá ferðalagi sínu.