Efnavopnabúnaði eytt í Sýrlandi

Sýrlendingar hafa lokið við að eyða lykilbúnaði við efnavopnaframleiðslu og áfyllingu sprengihylkja. Þetta fullyrðir starfsmaður alþjóðlegu efnavopnastofnunarinnar, sem hefur fylgst með eyðingunni.

Í dag rennur út sá frestur, sem Sýrlendingum var gefinn til þess að eyða eða gera ónothæfan allan þann búnað, sem nauðsynlegur er til að framleiða efnavopn, þar á meðal efnablöndunarvélum og áfyllingarbúnaði.

Enn er þó eftir að eyða þeim vopnabirgðum, sem fyrir eru í landinu. Talið er að um þúsund tonn af eiturefnum og efnavopnum séu til staðar í Sýrlandi. Þar á meðal er bæði sinnepsgas og sarín.

Stefnt er að því að búið verði að eyða öllu þessu fyrir mitt næsta ár.