Stal bróðirinn heila John F. Kennedy?

Því er haldið fram að bróðir John F. Kennedy hafi stolið heila forsetans úr þjóðskjalasafni Bandaríkjanna. Þetta kemur fram í nýrri bók James Swanson, End of Days: The Assassination of John F Kennedy, sem kemur út innan skamms.

Í bókinni skrifar Swanson: „Ekki eru öll sönnunargögn í þjóðskjalasafninu. Eitt mikilvægt sönnunargagn er horfið - heili Kennedy.“

Swanson heldur því fram að bróðir forsetans, sem var ráðinn bani árið 1963, hafi stolið heilanum úr safninu til að koma í veg fyrir að upp kæmist um þau alvarlegu veikindi sem forsetinn glímdi við. Einnig hafi bróðirinn viljað koma í veg fyrir að upplýsingar um lyfjanotkun forsetans yrðu opinberar.

Hluta úr heila forsetans var komið fyrir á þjóðskjalasafninu en í október 1966 kom í ljós að heilinn var horfinn. Swanson segist hafa sannfærandi sannanir þess efnis að Robert Kennedy hafi ásamt aðstoðarmanni sínum, Angie Novello, stolið heila forsetans. Bókin kemur út 12. nóvember.