Berklasmitum fer fjölgandi í Danmörku

Ný rannsókn í Danmörku, þar sem munnvatnssýni var tekið hjá tæplega tólf hundruð Kaupmannahafnarbúum, leiðir í ljós að berklar eru mun útbreiddari sjúkdómur meðal heimilislausra í Danmörku en hann er í löndum þar sem berklar eru landlægir eins og í Sambíu, Nígeríu, Bangladesh og Kongó. Þetta kemur fram á vef Politiken.

Af hverjum hundrað sem tóku þátt í rannsókninni voru tveir til þrír með alvarlega berklasýkingu.

Yfirlæknir í Danmörku sem greinir, meðhöndlar og rannsakar berkla segir þennan fjölda koma gríðarlega á óvart þar sem fjöldi berklasjúkra meðal útigangsmanna í Kaupmannahöfn sé sambærilegur fjölda tilfella hjá námuverkamönnum í Suður-Afríku.

Berklatilfellum hefur þó farið fjölgandi í Skandinavíu síðustu ár. Í Danmörku voru til dæmis 407 tilfelli skráð á síðasta ári en 329 árið 2009.

Munnvatnssýnin voru aðallega tekin af heimilislausum Kaupmannahafnarbúum en sjúkdómurinn er afar smitandi og lífshættulegur.

Læknirinn danski segir þessa niðurstöðu sýna að berklar séu vaxandi vandamál í Danmörku en tekur þó fram að hópurinn, sem lifir í samfélagi heimilislausra, smiti aðallega sín á milli þannig að hinn almenni borgari þurfi ekki að líta á þessar niðurstöður sem ógn við sína heilsu eins og staðan er í dag.