Leyniskyttur í Sýrlandi skjóta óléttar konur

David Nott er breskur skurðlæknir sem starfar sem sjálfboðaliði á sjúkrahúsum í Sýrlandi. Hann segir að leyniskyttur í borgarastyrjöldinni sem þar geysar spili sín á milli skotmarkaleik. Þar á lista eru óléttar konur og börn. CNN greinir frá.

David hefur þurft að framkvæma aðgerða á konum sem voru margar hverjar vel á veg komnar. Sumar komnar sjö til níu mánuði á leið og mjög greinilegt að þær væru óléttar.

David segir 90% aðgerða sem hann geri séu vegna sára sem leyniskyttur hafa valdið. „Suma daga vorum við með tíu til fimmtán skotsár á svipuðu svæði líkamans. Sem dæmi fengum við einn daginn 15 eða 16 skotsár og þar af hafði í átta eða níu skipti verið miðað á vinstri hluta nárasvæðisins. Daginn eftir var mikið af skotsárum hægra megin. Fyrir mér virðist einhvers konar leikur vera í gangi á milli skyttnanna.“

Hann sagði innlenda lækna hafa hafa heyrt að skytturnar fengju litlar gjafir eins og sígarettupakka fyrir manneskjur sem þeir skjóta.

Myndbandið hér að neðan gæti vakið óhug.