Konungleg skírn í London

Skírnin fór fram í höll Heilags James í miðborg London í dag en athöfnin var lítil og var aðeins nánasta fjölskylda og vinir Vilhjálms Bretaprins og Katrínar Hertogaynju viðstaddir. Fjölmargir Bretar söfnuðust fyrir utan höllina og höfðu einhverjir beðið frá því í gær. Maria Scott, íbúi í London, var ein þeirra

„Það var erfitt að bíða í nótt í rigningunni og við urðum holdvot, en við viljum vera hérna fyrir skírnina hjá prinsinum. Við vorum við spítalann þegar hann fæddist og við viljum vera hérna fyrir skírnina líka.”

Með því að skíra í höll Heilags James víkja ungu hjónin talsvert frá fyrri hefðum en venjulega hafa ríkisarfar verið skírðir í Buckingham höll. Hafa sumir haldið því fram að athöfnin hafi verið haldin þar vegna tengsla fjölskyldunnar við höllina en Díana prinsessa var lögð þar til hvílu áður en útför hennar fór fram. Sjö nánir fjölskylduvinir voru valdir til að vera guðforeldrar drengsins sem fæddist 22. júlí.  

Erkibiskupinn af Kantaraborg, Justin Welby, var staddur á Íslandi í gær en flaug heim til Bretlands til að skíra piltinn.

„Það gefur manni tilfinningu fyrir því að horfa fram á veginn, hvernig sagan líður áfram en hefur um leið sína fortíð. Þvílík gjöf að fá þetta nýja líf og horfa fram á veginn.“

Eins og foreldrarnir höfðu áður tilkynnt fékk prinsinn, sem er þriðji í röðinni um bresku krúnuna, nafnið George Alexander Louis sem á íslensku hefur verið útfært sem Georg Alexander Loðvík.