Írsku stúlkunni var ekki rænt

Írska Róma-stúlkan sem tekin var frá foreldrum sínum síðasta mánudag reyndist vera líffræðileg dóttir hjónanna. Það kom í ljós eftir að DNA-próf hafði verið framkvæmt og er stúlkan nú komin aftur til fjölskyldu sinnar.

Lögreglan tók stúlkuna frá foreldrum sínum og fól barnaverndaryfirvöldum umsjá hennar eftir að hafa fengið ábendingu um að stúlkan líktist ekkert foreldrum sínum og því væri mögulega eitthvað saknæmt á seyði hjá fjölskyldunni.

Málið kom upp eftir mikla fjölmiðlaumfjöllun um ljóshærða stúlku sem tekin var af grískri Róma-fjölskyldu nokkru áður vegna gruns um barnsrán.

Foreldrar írsku stúlkunnar ætla að taka sér tíma til að jafna sig eftir málið og hlúa að dótturinni áður en þeir ákveða hvort þeir kæri málið.