Sendiherra Bandaríkjanna í Þýskalandi kallaður á teppið

Utanríkisráðherra Þýskalands, Guido Westerwelle hefur kallað sendiherra Bandaríkjanna í Þýskalandi á teppið. Ástæðan eru nýjar upplýsingar um njósnir Bandaríkjamanna en fullyrt er að þeir hafi meðal annars hlerað síma Angelu Merkel Þýskalandskanslara. Sendiherranum, John Emerson, hefur verið skipað að mæta til fundar við utanríkisráðherrann síðar í dag að því er breska ríkisútvarpið greinir frá.

Leiðtogar Evrópusambandsins hittast í Brussel í dag og hefur Frakklandsforseti, Francois Hollande, lagt til að hlerunarmálið verði tekið upp á fundinum, en áður hafa borist fregnir um víðtækar hleranir Bandaríkjamanna í Frakklandi.