Bærinn lýstur upp með risastórum speglum

Bæjaryfirvöld í Rjukan í Noregi hafa sett upp þrjá risastóra spegla í 450 metra hæð yfir bænum. Tilgangur speglanna er að endurvarpa sólarljósi yfir bæinn. Hann er staðsettur í djúpum dal og þegar sólin lækkar á himni skín sólin ekki yfir bæinn frá september fram í mars. Frá þessu er sagt á vefnum Mail Online.

Hugmyndin kom fyrst upp fyrir hundrað árum en maður að nafni Martin Andersen teiknaði upp speglana og fékk til verksins styrk upp á fimm milljónir norskra króna, eða rúmlega 100 milljónir króna. Speglarnir elta sólina og endurvarpa ljósinu niður á torg bæjarins og búnaðurinn er keyrður af sólarrafhlöðum.

Áður fyrr fóru bæjarbúar í sértilgerðum kláfi upp á fjall yfir bænum, þar sem hægt er að taka inn geisla vetrarsólarinnar. Bæjarstjóri Rjukan sagði í samtali við Telegraph að það væri mjög sérstakt að standa í ljósinu á torginu og finna hitann. „Þetta er fyrir fölu börnin í Rjukan.“

Á Íslandi eru sveitarfélög þar sem vert væri að skoða þessa hugmynd.