Hæg efnaskipti sögð stuðla að ofþyngd

Svo virðist sem mýtan um hæg efnaskipti fólks í yfirvigt sé sönn í tilfellum sumra. Þetta eru niðurstöður rannsóknar sem gerð var við háskólann í Cambridge.

Yfirmenn rannsóknarinnar segja að stökkbreytt erfðaefni geti hægt á efnaskiptunum en að þetta eigi við um innan við eitt prósent fólks og glíma margir þeirra við mikla ofþyngd strax í barnæsku. Niðurstöðurnar eru þó sagðar geta hjálpað til í baráttunni við ofþyngd, jafnvel í tilfellum fólks með eðlileg efnaskipti.

Rannsakaðar voru mýs sem fæddust án gens sem kallast KSR2 og í ljós kom að þær áttu það frekar til að þyngjast. Í kjölfarið var 2.101 einstaklingur í mikilli yfirvigt rannsakaður en í þeim hópi voru nokkrir með stökkbreytt afbrigði af geninu. Bæði voru efnaskipti þeirra hægari en annarra og einnig var matarlystin meiri.

Að sögn Sadafs Farooqi, yfirmanns rannsóknarinnar, er þó ýmislegt fleira sem hefur áhrif á líkamsþyngd eins og alvitað er. Má þar nefna hreyfingu og matarvenjur, en hann segir engu að síður rannsóknina leiða það í ljós að sumir eigi það frekar á hættu að vera í yfirvigt en aðrir.