Brjálað veður í Bretlandi

Aftakaveður gengur nú yfir Bretlandseyjar og hefur Suður-England orðið verst úti. Miklar tafir eru á samgöngum en um miðnættið fór að blása fyrir alvöru. Rafmagnslínur hafa víða rofnað og tré rifnað upp með rótum í veðurofsanum en vindstrengirnir ná allt að hundrað og fjörutíu kílómetra hrða á klukkustund.

Þá eru flóðaviðvaranir víða í gildi við strandlengjuna. Ljóst er að einn hið minnsta hefur látið lífið í veðurofsanum, en þar var um að ræða fjórtán ára gamlan dreng í bænum Newhaven sem drukknaði þegar alda hreif hann með sér á haf út.Flestum lestarferðum hefur verið aflýst til að minnsta kosti níu eða uns veðrinu slotar og á Heathrow flugvelli hefur stórlega verið dregið úr flugumferð þannig að tugum ferða hefur verið frestað.