Solberg meðal tveggja ráðherra sem ekki báðu um guðs hjálp

Erna Solberg, nýsettur forsætisráðherra Noregs, er einn af aðeins tveimur ráðherrum af átján í nýju ríkisstjórninni sem ákvað að minnast ekki á Guð þegar embættiseiðar voru svarnir. Þetta eru mikil umskipti frá ríkisstjórn Jens Stoltenbergs, en á átta árum voru aðeins sautján af 39 ráðherrum sem minntust á guð í eiðum sínum, og þar var Stoltenberg sjálfur ekki meðtalinn þar sem hann er ekki meðlimur í ríkiskirkjunni. Þetta kemur fram í kristilega dagblaðinu Vårt Land.

Stjórnarskráin kveður á um að ráðherrar sverji stjórnarskrá og konungi hollustueið, en þeim er í sjálfvald sett hvort beðið sé um guðs hjálp.

Eiðurinn er sem hér segir á frummálinu: „Jeg [nafn viðkomandi] lover og sverger, å vise Konstitusjonen og Kongen lydighet og troskap, så sant hjelpe meg Gud den Allemktige og Allvitende.“

Solberg og Vidar Helgesen aðstoðarforsætisráðherra sóru eiða sína árið 2001 þegar þau tóku sæti í ríkisstjórn Kjell Magne Bondevik og endurnýjuðu hann ekki sérstaklega að þessu sinni. Aðspurð segir Solberg að hún hafi ekki spáð mikið í hvort guðs hafi verið getið í eiðstafnum. Hún grunar að hún hafi einfaldlega undirritað skjalið eins og það kom til hennar.

„Í okkar stjórn eru kannski fleiri sem eru meðlimir í ríkiskirkjunni. Þetta er kannski tengt flokkslitunum. En þetta gekk ansi fljótt fyrir sig eftir að við komum inn í Konungshöllina, þannig að ég  veit ekki hversu margir íhuguðu [hvort getið væri um guð í eiðstafnum],“ sagði Solberg.

Nýja ríkisstjórnin er samsteypustjórn tveggja hægri flokka, Hægriflokksins, sem Solberg til heyrir, og Framfaraflokksins. Stjórn Stoltenbergs var hins vegar sett saman úr þremur flokkum, frá vinstri inn að miðju.