Gera smyglbíla upptæka

Norsk yfirvöld hafa hert verulega á viðurlögum við smygli og nú eiga þeir sem eru staðnir að smygli með bílum yfir höfði sér að missa bæði bílinn og ökuskírteinið auk hefðbundinna refsinga. Frá þessu segir á vef Aftenposten.

Síðustu ár hefur verið gríðarmikið um smygl á tóbaki og áfengi, ekki síst á landamærunum við Svíþjóð þar sem 130 bílar voru teknir í fyrra, margir sérútbúnir til smyglstarfsemi. Flestir þeirra einstaklinga sem staðnir eru að slíku eru frá Austur-Evrópu, aðallega Póllandi.

Ekkert lát er á straumi fólks og hafa tollayfirvöld til dæmis lagt hönd á á milli 80 og 90 þúsund lítra af áfengi við sænsku landamærin það sem af er þessu ári.

Vona tollayfirvöld að með hertari viðurlögum og upptöku bíla muni hugsanlegir smyglarar hugsa sig tvisvar um áður en lagt verður upp í slíkar ferðir.