Risastrandbolti olli usla í London

Úrræðagóður bílsstjóri kom í veg fyrir slys í morgun þegar hann sprengdi risastóran strandbolta sem var laus í miðborg London í dag. Hinn 10 metra breiði strandbolti fauk af toppi byggingar þar sem hann hefur verið frá því í mars og fór á flakk um borgina.

Starfsmaður borgarinnar sýndi snör viðbrögð þegar hann lagði bíl sínum þvert fyrir boltann og náði að sprengja hann. Það er ekki á hverjum degi sem svona stór strandbolti skoppar um stræti London.

Stormur kom upp að ströndum Bretlandseyja snemma í morgun sem hefur valdið talsverðum skemmdum og eru fjórir látnir.