Móðir Baby P látin laus

Móðir Peter Connelly, sem varð þekktur sem Baby P eftir dauða sinn, verður látin laus úr fangelsi á næstunni. Móðirin, Tracey Connelly  var dæmd í fimm ára fangelsi hið minnsta í maí 2009 fyrir að valda dauða sonar síns sumarið 2007. Þetta kemur fram á vef Guardian.

Peter litli var 17 mánaða þegar hann lést eftir hrottalegar misþyrmingar af hálfu móður sinnar, stjúpföður og frænda. Barnaverndaryfirvöld í Bretlandi höfðu fengið yfir 60 tilkynningar um að foreldrar barnsins vanræktu hann alvarlega. Þrátt fyrir það var drengurinn ekki tekinn af þeim.

Málið vakti mikla reiði í Bretlandi og vakti það sömuleiðis mikla athygli hér á landi. 

Áfrýjunarnefnd fangelsismála í Bretlandi hefur tekið mál Tracey fyrir og mælt hefur verið fyrir reynslulausn fyrir hana. Fyrst var fjallað um mál Tracey fyrir áfrýjunarnefndinni í ágúst 2012 en þá var ekki mælt með reynslulausn.

Í yfirlýsingu frá áfrýjunarnefndinni segir að að tekið sé tillit til brota konunnar, hegðun hennar og meðferð í fangelsinu, auk skýrslna frá meðal annars sálfræðingi og fangelsisvörðum.

Tracey, sem er 32 ára í dag, verður á skilorði það sem eftir er ævi sinnar og getur verið kölluð í fangelsi hvenær sem er, ef hún brýtur einhver þau skilyrði sem henni verða sett.

Stjúpfaðir drengsins, Steven Barker, var einnig dæmdur fyrir að valda dauða Peter en auk þess var hann dæmdur fyrir að nauðga tveimur 10 ára stúlkum. Hann fékk 10 ára dóm. Bróðir Steven var einnig dæmdur fyrir sína þátttöku í þeim atburðum sem leiddu til dauða drengsins en fékk hann styttri dóm en hin og var látinn laus í ágúst 2011 en var aftur settur í fangelsi í apríl á þessu ári.