Yfirlögregluþjónn vill lögleiða fíkniefni

Yfirlögregluþjónn á Englandi kallar eftir því að eiturlyf í A-klassa verði gerð lögleg og að eiturlyfjastefna landsins verði endurskoðuð. Frá þessu greinir á vef The Guardian.

Yfirlögregluþjónninn, Mike Barton, starfar í Durham. Hann er einn af reyndustu baráttumönnum Englendinga gegn glæpum og hefur sett af stað framtak í því skyni að brjóta upp tengslanet glæpagengja í Durham. Á svæðinu þar sem hann starfar mældist 14 prósenta fækkun í heildarfjölda glæpa snemma á árinu. Hann hefur lagt til að heilbrigðisyfirvöld gætu séð fíklum fyrir eiturlyfjum. Það myndi þá þýða að eiturlyfjasalar gætu ekki lengur einokað markaðinn og glæpagengi myndu verða af þeim tekjum sem sala á eiturlyfjum sér þeim nú fyrir.

Barton ber eiturlyfjabannið við bannið gegn áfengi snemma á 20. öldinni en það hafði þau áhrif að mafían með Al Capone í fararbroddi varð valdamikil. Barton heldur því fram að það að gera eiturlyfjasölu ólöglega hafi fitað buddu glæpagengja um milljarði punda. Þeir sem sammála eru Barton um að breyta þurfi eiturlyfjastefnunni hrósa Barton í hástert og segja þessa gagnrýni hans á óbreytt ástand hugrakka og skynsamlega.

„Ef að fíkill gæti nálgast eiturlyf í gegnum heilbrigðisyfirvöld eða eitthvað álíka, þá myndu þeir ekki þurfa að fara út og kaupa ólögleg efni,“ skrifar Barton í grein sem birtist í The Observer. „Ekki öll glæpagengi byggja afkomu sína á eiturlyfjasölu, en af minni reynslu að dæma gera þó flest það. Þannig að ef við bjóðum upp á nýja leið fyrir fíkla til þess að nálgast efnin erum við að klippa á tekjustreymi gengjanna.“

Hann segist þó ekki vera talsmaður þess að sala fíkniefna eigi að vera frjáls. „Það sem ég er að segja er að fíkniefnum ætti að vera stjórnað.“ Hann tekur dæmi um að ef að fíkniefni væru afgreidd af læknum þá myndi útbreiðsla lifrarbólgu C og eyðni minnka meðal sprautufíkla. Barton sagði að ólíkt þeim sem selja fíkniefni ætti ekki að refsa fíklum fyrir lögbrot. „Það þarf að huga að þeim og meðhöndla þá og hvetja þá til þess að brjótast út úr hringrás fíknarinnar. Það þarf ekki að refsa þeim.“