Íslendingur í Noregi játar morð

Íslendingurinn sem er í haldi norsku lögreglunnar fyrir að hafa myrt þekktan útvarpsmann í Noregi í maí síðastliðinn hefur gengist við brotinu. Hann lagði til hins látna með pylsuhníf og stakk hann þrívegis í bakið og einu sinni í brjóst.



Norska blaðið VG greinir nánar frá atburðarásinni á vef sínum í dag.  

Þar segir að fórnarlambið, fimmtugi útvarpsmaðurinn Helge Dahle hafi reynt að stöðva Íslendinginn sem var í stympingum við annan mann, með því að sparka í höfuð hans. 

Íslendingurinn er á fertugsaldri og býr í Grimstad en hann hefur verið búsettur í Noregi frá árinu 2005.

Mennirnir sátu saman að sumbli í veislutjaldi í maílok við heimili í bænum Valle. Atbuðarásin átti sér stað árla morguns en þá var fórnarlambið, Helge Dahle, stunginn þrívegis í bakið og einu sinni í brjóstkassann. Hann var fluttur á sjúkrahús í Osló en lést þar af sárum sínum.

Fram kemur einnig á vef VG að morðvopnið hafi verið pylsuhnífur með skafti úr hreindýrahorni, sem var í eigu milljarðamæringsins Knut Axel Ugland.

Knut sem er lykilvitni í málinu hafði tekið með sér heimagerðar salamí og ölpylsur í partíið og notaði hann hnífinn við að skera pylsurnar niður í gestina. Hann vildi ekki tjá sig við blaðamenn VG af ótta við að það gæti skaðað dómsmálið.