Fjölskylduendurfundir á dagskrá í Kóreu

Yfirvöld í Norður-Kóreu hafa fallist á tillögu granna sinna í suðri um að standa fyrir endurfundum milli ættingja sem hafa ekki getað hist frá því að í sundur skildi í Kóreustríðinu sem geysaði á árunum 1950 til 1953.

Slíkir endurfundir áttu sér stað nokkrum sinnum frá árinu 2000 fram til 2010, þar sem um 22.000 manns fengu að hitta skyldmenni sín í fyrsta sinn í áratugi, en Suður-Kórea veitti Norður-Kóreu mataraðstoð í skiptum fyrir að leyfa fundina.

Eftir það tóku samskipti landanna að hríðversna með átökum og deilum, meðal annars um kjarnorkuáætlun Norður-Kóreu og sameiginlegar heræfingar Suður-Kóreu og Bandaríkjanna.

Verst var ástandið fyrr á þessu ári þegar Norður-Kórea lokaði aðgangi Suður-Kóreumanna að Kesong iðnaðarmiðstöðinni og hótaði kjarnorkuárásum, en nú virðist sem um sé að hægjast.

80 þúsund Suður Kóreumenn voru á skrá yfir að fá að hitta ættmenni sín norðan landamæranna þegar lokað var fyrir endurfundina árið 2010.