Egypski herinn stefnir ekki að því að taka völdin

Abdel-Fatah el-Sissi, varnarmálaráðherra Egyptalands og yfirmaður hersins þar í landi hét því í dag að herinn stefndi ekki að því að taka völdin í landinu, en þeir muni ekki líða frekara ofbeldi á götum úti. Mikil spenna hefur verið í landinu í dag þar sem boðað hefur verið til fjöldamótmæla til stuðnings Múhameds Morsí, sem herinn hrakti úr embætti forseta í síðasta mánuði.

Það sem af er degi hafa stjórnarliðar handtekið tugi liðsmanna Bræðralags múslima, sem Morsí tilheyrir, en í sjónvarpsávarpi í dag hvatti el-Sissi engu að síður til þess að íslamistar, þar á meðal stuðningsmenn Morsís, yrðu hafðir með í ráðum varðandi stjórn landsins. Samkvæmt tímaáætlun sem herinn hefur sett fram, er gert ráð fyrir að endurskoðun stjórnarskrár landsins verði lokið fyrir kosningar til forseta og þings á næsta ári.

Hundruð manna liggja í valnum eftir að stjórnvöld létu til skarar skríða gegn stuðningsmönnum Morsís í síðustu viku, og sér ekki enn fyrir endann á ofbeldinu.

Þetta er fyrsta yfirlýsing hersins síðan allt fór í bál og brand en el-Sissi sagði að herinn myndi ekki standa hjá og horfa á landið rústað. Herinn sæki ekki í völd, heldur aðeins að „vernda vilja þjóðarinnar sem er mun dýrmætara en að stjórna Egyptalandi“.

„Við höfum boðið upp á mörg tækifæri til að enda þessa deilu með friðsömum hætti og biðjum nú stuðningsmenn fyrri stjórna að taka þátt í endurreisn lýðræðisins og taka þátt í stjórnmálum í framtíðinni í staðin fyrir að efna til deilna og rústa Egyptaland.“