Fleiri Bretar deyja í slysum vegna ölvunaraksturs

Ölvunarakstur orsakaði 290 dauðsföll í Bretlandi á síðasta ári, sem er fjórðungsaukning frá árinu 2011, þegar 250 dauðsföll mátti rekja til ölvunaraksturs. Þetta kemur fram í nýrri skýrslu samgöngustofnunar í Bretlandi og fréttastofa Sky segir frá.

Langflestir þeirra sem létust í slysunum, eða tveir af hverjum þremur, voru ölvuðu ökumennirnir sem báru ábyrgð á slysunum.

Þessi aukning þykir sérstaklega slæm þar sem með henni er snúið við afar jákvæðri þróun síðustu ára, en 2011 var besta árið í þessum efnum frá því að farið var að halda utan um þessar tölur árið 1979.

Fyrstu árin létust yfirleitt yfir 1.400 manns á ári í slysum af völdum ölvunaraksturs, en sú tala lækkaði nokkuð stöðugt. Eftir síðustu aldamót létust árlega á bilinu 500 til 600 manns í slysum sem þessum, en síðustu fimm ár hefur enn orðið mikil bragarbót á í þessum efnum, þar til nú.

Hér á landi var eitt dauðsfall á síðasta ári rakið til aksturs undir áhrifum áfengis eða vímuefna, en frá árinu 2006 hafa 25 látist af þeim sökum hér á landi.