Europol handtekur glæpagengi

Fjórir menn, aðilar að skipulögðum glæpahóp, hafa verið handteknir grunaðir um að smygla gríðarlega miklu magi af efnum til fíkniefnaframleiðslu. Þessi efni eru notuð til ólöglegrar framleiðslu á amfetamíni og MDMA aðallega í Hollandi.

Handtökurnar fóru fram í Hollandi en mennirnir voru bæði hollenskir og pólskir ríkisborgarar. Leit var gerð á tíu heimilum og efnaverksmiðjum. Rannsóknin hefur leitt í ljós að hópurinn hafði þegar flutt til Hollands yfir 100 þúsund lítra af efnum frá því í upphafi ársins 2012. Framleiðsla þessara fíkniefna, amfetamíns og MDMA er ekki möguleg án þessara efna sem hópurinn smyglaði.

Það voru lögregluyfirvöld í Hollandi og Póllandi sem unnu að rannsókninni í samstarfi við Europol sem hefur stutt við rannsóknir sem þessa frá því árið 2010 í því skyni að ná til skipulagðra glæpahópa.