Stálu farangri eftir flugslys

Starfsmaður flugfélagsins United Airlines og eiginkona hans hafa verið ákærð fyrir að stela farangri eftir flugslys á San Fransisco-flugvelli í byrjun mánaðar.

Sean Sharif Crudup og Raychas Elizabeth Thomas voru handtekin eftir að eftirlitsmyndavélar sýndu Crudup rétta Thomas töskurnar, en þær voru í eigu fólks sem upphaflega átti að lenda í San Fransisco áður en slysið varð.

Flugvél fólksins var hins vegar beint annað eftir slysið en farangur þeirra sendur til San Fransisco, þar sem ákærðu tóku hann. Thomas er sagður hafa skipt fatnaði úr ferðatöskunni í fataverslun og fengið fyrir hann um 5.000 dali, en það jafngildir um 600 þúsund krónum.

Alls létust þrír í flugslysinu á San Fransisco-flugvelli þegar Boeing-þota frá Asiana-flugfélaginu brotlenti. Um 180 slösuðust.