Ísraelar svara ESB

Ísraelsstjórn hefur ákveðið að takmarka allt samstarf við fulltrúa Evrópusambandsins á herteknu svæðunum á Gasa og Vesturbakkanum. Þetta eru viðbrögð Ísraela við nýjum reglum Evrópusambandsins, sem banna allt samstarf við ísraelska landtökumenn á herteknu svæðunum.

Moshe Ja‘alon, varnarmálaráðherra Ísraels, hefur fyrirskipað að allri aðstoð ráðuneytisins við fulltrúa ESB á þeim svæðum Vesturbakkans, sem eru undir fullri stjórn Ísraels, verði hætt. Einnig verði fulltrúum ESB gert erfiðara að fara í gegnum landamærin að Gasa.

Ísraelska dagblaðið Haaretz skýrir frá þessu.

Ísraelsk yfirvöld taka þó fram að þetta eigi eingöngu við starfsemi á vegum Evrópusambandsins sjálfs, ekki einstakra aðildarríkja ESB.

Breska dagblaðið The Guardian fullyrðir að í nokkra daga hafi engir hjálparstarfsmenn á vegum ESB fengið leyfi ísraelskra stjórnvalda til að fara inn á Gasasvæðið.