Mugabe sigurviss fyrir forsetakosningar

Robert Mugabe, forseti Afríkuríkisins Simbabve, er fullviss um sigur í forsetakosningunum sem fram fara í landinu á miðvikudag.

Mugabe hefur ráðið ríkjum í 33 ár og er 89 ára gamall. Hann á í höggi við Morgan Tsvangirai forsætisráherra, en þessir erkióvinir hafa farið saman með völdin síðustu fimm ár.

Tsvangirai, sem var fyrir síðustu kosningar fremstur í flokki stjórnarandstæðinga, þykir standa höllum fæti, enda neytir Mugabe allra sinna pólitísku aflsmuna til að sigra. Meðal annars hafa fjölmiðlar velt sér upp úr hneykslismálum tengdum Tsvangirai, en margir fyrrum stuðningsmenn hafa einnig misst trú á honum eftir að hafa setið á valdastólum síðustu ár.

Mörg erfið viðfangsefni bíða næstu stjórnar og forseta. Atvinnuleysi ungs fólks og menntunarmál ekki síst, en efnahagsmálin eru þó í forgrunni.Þar hafa þeir Mugabe og Tsvangirai gjörólíka sýn á málin þar sem hinn fyrrnefndi vill þjóðnýta á annað þúsund erlendra fyrirtækja í landinu, en hinn síðarnefndi vill auka erlenda fjárfestingu og bæta ímynd landsins á alþjóðavettvangi.

Ofbeldi hefur ekki verið eins áberandi í þessum kosningum og áður hefur tíðkast, en háværar raddir hafa verið uppi um að Mugabe og flokkur hans hyggist tryggja sér sigur með öllum ráðum. Tsvangirai sakar Mugabe um kosningasvik og segir kjörstjórn ekki vandanum vaxna.

Mugabe hefur bannað eftirlitsaðilum frá Vesturlöndum að fylgjast með framkvæmd kosninganna og sakar Breta og Bandaríkjamenn um að vera í makki með Tsvangirai, sem er föðurlandssvikari að hans mati.

Báðir frambjóðendur hafa þó heitið því að virða niðurstöður kosninganna, en margir sérfræðingar í málefnum Simbabve telja möguleika á að herinn skerist í leikinn ef Mugabe tapar, enda eru helstu herforingjarnir nátengdir forsetanum og hafa margir efnast gríðarlega af þeim sökum.