Leynihöfundur reyndist vera J.K. Rowling

J.K. Rowling, höfundur Harry Potter, er ekki við eina fjölina felld. Fyrr á árinu sendi höfundur sem kallaði sig Robert Galbraith frá sér glæpasöguna „The Cuckoo's Calling,“ og fékk frábærar undirtektir. Nú hefur verið flett ofan af því að Galbraith sé í raun Rowling, sem skrifaði undir dulnefni.

Sérfræðingar tóku eftir ýmsum líkindum á ritstíl Harry Potter og The Cuckoo's Calling  og fékkst það staðfest í gær að höfundarnir væru ein og sama manneskjan. Rowling sagðist hafa skrifað undir dulnefni til að fá hlutlausa gagnrýni á bókina.

„Ég var að vonast til að geta haldið þessu leyndu aðeins lengur. Það er alveg frábært að geta gefið út bók án þess að vera með svona gífurlega mikla pressu á sér eins og ég er vön,“ sagði Rowling í viðtali.

Eftir að upp komst um málið rauk sala á The Cuckoo's Calling upp úr öllu valdi,  en hún fimmtánhundruðfaldaðist.

Glæpasagan fjallar um dularfullt dauðsfall ofurfyrirsætu og höfðu gagnrýnendur furðað sig á kvenlegu innsæi karlkyns rithöfundar.

Frá þessu er greint á vef Daily Mail.