Langvarandi kannabisneysla kann að draga úr metnaði

Samkvæmt nýrri rannsókn frá Imperial háskólanum í Lundúnum virðast langtímanotendur kannabisefna framleiða minna af dópamíni en aðrir.

Rannsóknin leiddi í ljós að magn dópamíns í hluta heilans sem kallast striatum var almennt minna hjá langtímaneytendum efnisins og hjá þeim sem byrjuðu að neita þess við ungan aldur, heldur en almennt gerist. Rannsakendurnir telja þetta skýra hvers vegna suma kannabisneytendur virðist skorta metnað til að stunda vinnu eða rækja almenn áhugamál.

Rannsóknin var framkvæmd af vísindamönnum við Imperial háskólann í Lundúnum, UCL og King's háskólann í Lundúnum. Hún var fjármögnuð af Rannsóknarráði læknisfræða (e. Medical Research Council) og gefin út í fagtímaritinu Biological Psychiatry.

Rannsakendurnir notuðust við svokallaðar PET myndir af heilum þáttakenda til að kanna dópamínframleiðslu í striatum-svæði heilans í 19 kannabisneytendum og framkvæmdu svo sömu rannsókn á 19 aðilum sem ekki neyttu efnisins, af sama kyni og á sama aldri.

Allir kannabisneytendurnir höfðu upplifað einkenni geðrofa við neyslu efnisins, til dæmis með því að upplifa ofsjónir, óvenjulegar skynjanir eða skrýtnar hugsanir á borð við þá að þeim stæði ógn af einhverju óþekktu.

Rannsakendurnir höfðu í upphafi talið að neytendur efnisins byggju við aukna framleiðslu dópamíns í ljósi þess að þeir höfðu allir upplifað einhverskonar geðrof, sem tengjast jafnan aukinni dópamínframleiðslu. Svo var ekki heldur varð niðurstaðan gagnstæð.

Neytendurnir sem tóku þátt í rannsókninni höfðu allir hafið neyslu á bilinu 12 til 18 ára aldurs. Það var fylgni á milli lægri dópamínframleiðslu og því hversu snemma viðkomandi hafði hafið neyslu sína. Þá var einnig sambærileg fylgni við þá sem reyktu meira.

Aðrar rannsóknir sem tekið hafa tekið til fyrrum kannabisneytenda hafa ekki bent til þess að dópamínframleiðsla þeirra sem neyttu áður efnisins sé minni en annarra. Það þykir benda til þess að hægt sé að snúa lágri dópamínframleiðslu við með því að hætta neyslunni.

Nánar er fjallað um málið á vef Imperial College London.