Fregnir af manntjóni farnar að berast

Að minnsta kosti tveir eru látnir og 61 særðir eftir að flugvél brotlenti og eldur kom upp á alþjóðaflugvellinum í San Francisco.

Þetta kemur fram á vef KTVU.com sem segir slökkvilið á svæðinu hafa staðfest að tveir séu látnir. Búið er að slökkva eldinn í vélinni en hún var böðuð í froðu og vatni eftir að slökkvilið komst á vettvang. Öllum aðkomandi flugvélum hefur verið beint að Oakland-flugvelli og öll umferð um hann er nú lokuð.

Samkvæmt vitni rifnaði stélið af vélinni, sem er af gerðinni Boeing 777, þegar lendingarhjólin höfðu snert flugbrautina með fyrrgreindum afleiðingum. Einhverjir farþeganna hafa þurft aðhlynningu vegna brunasára.

Flugyfirvöld munu nú hefja rannsókn á orsök slyssins, sem liggur ekki enn fyrir.

Boeing 777 er ein vinsælasta flugvélin í löngum millilandaflugum sem eru lengri en 12 tímar. Allt að 300 farþegar komast fyrir í vélinni.

Hér má heyra vitni lýsa því hvernig slysið átti sér stað: