Tækniframfarir í flugvélahönnun urðu mörgum til lífs

Tækni við hönnun og byggingu flugvéla hefur stórbatnað seinustu áratugi og sérfræðingar telja að vegna þeirra hafi jafn margir lifað af flugslysið í San Francisco og raun ber vitni. Flugvélar hafa verið styrktar og léttar með tækniframförum sem eru til komnar meðal annars vegna flugslysarannsókna.

Á meðan lendingarbúnaður er hannaður til að brotna undan vélinni hefur skrokkur vélarinnar og sæti verið styrkt til að vernda farþegana betur.

„Þetta er vegna þess sem við höfum lært af eldri slysum, sem þakka má frábærum flugslysarannsóknum og lærdómi af því sem hefur farið úrskeiðis," segir Kevin Hiatt, framkvæmdastjóri Flugöryggisstofnunarinnar í samtali við USA Today. „Þau lentu mjög harkalega og runnu niður flugbrautina og út af henni þar sem þau snérust. Það var frábær hönnun sem hélt öllu saman í vélinni sem varð til þess að fólk gat síðan farið út úr henni."

Boeing 777 er gjarnan álitin örugg vél, allt frá því að hún var fyrst tekin í notkun fyrir um 20 árum síðan.

Öryggisnefnd samgöngumála (National Transportation Safety Board, NTSB) sem rannsakar flugslys, hefur skráð 57 mis alvarleg slys þar sem vélin kemur við sögu.

Flugvélar eru gjarnan taldar mjög öruggur samgöngumáti. Í 95,7% skráðra tilfella NTSB lifa farþegar af flugslys. Samkvæmt tölum stofnunarinnar létust 2,280 farþegar af þeim 53,487 sem lent hafa í samtals 568 slysum.

Rannsakendur við MIT hafa einnig bent á að flugferðir séu einn öruggasti samgöngumátinn, sem slær meira að segja lyftum við í öryggi.

Einn mikilvægasti þátturinn í því hversu margir lifðu af slysið í San Francisco mun hvera hversu hratt og örugglega fólk fór frá borði, segir John Hansman, prófessor við MIT. Þar skipti höfuðmáli að fólk eyði ekki tíma í að taka föggur sínar og fari út án þess að taka með sér fartölvur eða annað slíkt.

Þetta kemur fram á vef USA Today.