Settu himinháan verðmiða á Kára

„Við hugsum mjög vel um okkur. Allt í kringum liðið er tipp topp og ekkert yfir neinu að kvarta," segir miðvörðurinn Kári Árnason.

Kári verður í eldlínunni með íslenska landsliðinu sem tekur á móti Slóveníu í undankeppni HM 2014 á Laugardalsvelli annað kvöld. Kári missti af fyrri leiknum þegar hann tók út leikbann. Líklegt má telja að hann byrji á morgun enda verið reglulega í liðinu undir stjórn Lars Lagerbäck.

„Ég hef enga tilfinningu fyrir því og virði ákvörðun Lars Lagerbäck. Að sjálfsögðu vona ég að ég spili eins og allir aðrir. En það er ekki hægt að búast við neinu," segir Kári um væntingar sínar til þess að byrja leikinn.

Kári og félagar dvelja á Hótel Nordica og deilir Víkingurinn herbergi með Hjálmari Jónssyni, leikmanni IFK Gautaborg.

„Þetta er mjög fínt. Við höfum verið saman áður og erum báðir mjög rólegir í tíðinni," segir Kári. Hann viðurkennir þó fúslega að aginn sé meiri á Hjálmari þegar kemur að því að fara að sofa.

„Það er nú oftast þannig að hann þarf að segja mér að slökkva ljósin enda er hann fjölskyldumaður. Ég er í hinu hlutverkinu."

Kári hefur nýlokið sínu fyrsta tímabili með Rotherham United. Liðið lék í ensku d-deildinni í vetur en tryggði sér sæti í c-deildinni. Það var töluverður léttir fyrir landsliðsmanninn.

„Það hefði ekki verið jákvætt að vera fastur í League two, eða League Poo, eins og menn kalla það," segir Kári léttur.

„Það var frábært að komast upp en það hefði verið algjör skandall hefði það ekki tekist miðað við hve miklum peningum var búið að ausa í liðið."

Hann segir deildina þess eðlis að það séu ekki endilega bestu liðin sem fari upp.

„Það er hart barist, vellirnir eru lélegir og dómararnir líka. Svo mætti lengi telja." Hann segir óvíst hvort hann verði áfram í herbúðum liðsins.

„Ég á eitt ár eftir af samningi. Ég ætla að sjá hvað gerist í sumar. Þetta er aðeins í lausu lofti. Planið hjá liðinu er að fara aftur upp um deild. Þetta er flott félag eins og staðan er í dag, vissulega ekki það stærsta, en þeir eru að reyna að bæta úr því."

Kári segir ákvörðun sína að fara til Rotherham hafa verið fjárhagslegs eðlis en hann hafi einnig litið svo á að hann væri að taka þátt í uppbyggingu.

„Svo þegar maður byrjar að spila hefði maður vonað til þess að taka skrefið ofar. Það eru allir að fylgjast með enska boltanum. Það kom einhver áhugi í vetur en þeir settu einhvern verðmiða sem enginn var tilbúinn að borga. Það er leiðin til að halda í leikmenn."