Pólitískur titringur milli Azera og Rússa vegna Júróvisjón

Pólitískur titringur á milli Asera og Rússa fer vaxandi í kjölfar þess að Aserar gáfu Rússum ekkert stig í Eurovision en Rússar gáfu Aserum 12 stig.

Eins og fram kom í gær hefur forseti Aserbætsjan krafist opinberrar rannsóknar á þessu, því samkvæmt athugunum hafi verið mikil ánægja með rússneska lagið í Aserbætsjan, bæði meðal dómnefndar og almennra kjósenda. Samkvæmt þeirri athugun hefði rússneska lagið átt að fá að minnsta kosti tíu stig frá Aserum.

Sergei Lavrov, utanríkisráðherra Rússlands sagði í gær, eftir fund með með Elmar Mammadyarov utanríkisráðherra Asera, að málið væri forkastanlegt og kanna þurfi það til hlýtar.