Fannst á lífi eftir sautján daga í rústunum

Kona fannst á lífi í dag í rústum átta hæða byggingar sem hrundi í borginni Dhaka í Bangladess fyrir sautján dögum.

Það tók um fjörutíu mínútur að bjarga konunni úr rústunum, en björgunarmenn heyrðu til hennar á annarri hæð hússins þar sem hún grátbað um hjálp. Hún var föst undir hrúgu af steypu og járni.

Konan, sem sögð er heita Reshma, segist hafa borðað þurrkaðan mat en á fimmtánda degi hafi hann klárast. Hún hafi þó haft aðgang að vatni. Hún var flutt á sjúkrahús til aðhlynningar en er ekki talin alvarlega slösuð.

Tala látinna í slysinu er komin yfir eitt þúsund, en flestir hinna látnu eru konur sem störfuðu í fataverksmiðju í húsinu. Að minnsta kostu níu hafa verið handteknir vegna málsins, þar á meðal eigandi hússins.