Auglýsing gegn heimilisofbeldi í Sádi-Arabíu

Nýverið sá almenningur í Sádí-Arabíu auglýsingu gegn heimilisofbeldi í fyrsta sinn á síðum þarlendra dagblaða.

Auglýsingin sýnir konu í níkab (heildarslæðu með rifu fyrir augun) með glóðarauga og undirtextann „Sumt er ekki hægt að hylja“. Listi yfir símanúmer kvennaathvarfa fylgir síðan í kjölfarið.

„Þetta er vandamál sem hefur verið sópað undir teppið svo árum skiptir,“ segir Scott Abbott hjá auglýsingastofunni Memac Ogilvy sem sér um herferðina.

Talið er að á bilinu sextán til fimmtíu prósent sádí-arabískra kvenna verði fyrir ofbeldi af hálfu maka síns, en engin viðurlög eru við ofbeldi og nauðgunum inni á heimilum.

Herferðin er studd af prinsessunni Banderi A.R. Al Faisal sem segir almannatengla sína hafa haft áhyggjur af þáttöku hennar.

„Ég skildi ekki hvers vegna,“ segir Al Faisal. „Hvað er svona umdeilt við þetta? Hver myndi segja að það væri í lagi að berja konur?“

Adam Coogle hjá mannréttindasamtökunum Human Rights Watch segir herferðina góða og gilda en talsvert meira þurfi að gera til að bæta ástandið.

Þá bendir hann á að ef kona sakar karlmann um nauðgun og hann segir að um kynmök með samþykki hafi verið að ræða, geti konan átt von á kæru fyrir hórdóm.