KFC-kjúklingi smyglað um jarðgöng til Gaza

„Franskarnar eru slepjulegar og kjúklingurinn löngu búinn að glata stökkleika sínum.“ Svona hefst grein sem The New York Times birtir á vef sínum í dag um smygl á kjúklingi frá KFC (áður Kentucky Fried Chicken) á milli Egyptalands og Gaza.

„Það er okkar réttur að njóta bragðs sem fólk um allan heim nýtur,“ segir Khalil Efrangi, 31 árs verslunareigandi í Gaza sem býður borgarbúum upp á þjónustuna, en fyrir 27 dollara (um 3.200 krónur) er hægt að kaupa tólf bita kjúklingafötu sem er um fjórar klukkustundir á leiðinni.

Efrangi er með vélhjólaflota á sínum snærum sem ferjar matinn á milli landamæranna með aðstoð leigubílstjóra, og hluti leiðarinnar er farinn um jarðgöng.

Það eru engir nafntogaðir skyndibitastaðir á Gazaströndinni, þar sem um 1,7 milljón Palestínumanna búa, og miklar hömlur eru á flutningi fólks og varnings í og úr borginni.

Árið 2011 opnaði KFC útibú í egypsku borginni El Arish, sem er skammt frá landamærunum, og í borginni Ramallah á Vesturbakkanum í fyrra. Myndaðist við þetta tækifæri fyrir íbúa Gaza til að nálgast þennan heimsþekkta en umdeilda skyndibita.

Þegar vinir Efrangi smökkuðu KFC-kjúkling sem hann kom með frá El Arish í síðasta mánuði var ekki aftur snúið, og hefur fyrirspurnunum rignt yfir hann síðan. Hann ákvað því að sinna eftirspurninni.

Nennir engu veseni

Undanfarnar vikur hefur hann skipulagt fjórar vel heppnaðar sendingar, sem samanlagt innihalda fleiri en hundrað matarpantanir.

Ferlið er flókið og byrjar Efrangi á því að panta matinn frá KFC-staðnum í El Arish og símsenda greiðslu fyrir hann. Egypskur leigubílstjóri sækir síðan matinn og fer með hann að landamærunum.

Hinum megin við landamærin bíður palestínskur leigubílstjóri við eftirlitsstöð Hamas í borginni Rafah, þar sem öryggisverðirnir þekkja hann undir nafninu „Kentucky-maðurinn“.

Þegar egypski bílstjórinn mætir á svæðið er sá palestínski látinn síga niður í jarðgöng þar sem hann gengur á móti tveimur drengjum sem draga matinn á eftir sér í kerru.

Þegar maturinn kemur síðan í verslun Efrangis skutlast vélhjólamennirnir með hann heim til svangra kjúklingaunnenda. Efrangi nennir þó ekki neinu veseni og því er aðeins hægt að panta kjúklingabita, franskar, salat og eplaböku hjá honum.

Adeeb al-Bakri, eigandi fjögurra KFC og Pizza Hut-staða á Vesturbakkanum, segir að hann hafi fengið leyfi fyrir að opna KFC í Gaza. Ferlið tekur þó sinn tíma, enda eru kröfur KFC um hráefni strangar.

Bakri hafði ekki heyrt af þjónustu Efrangi og leist ekkert á fjögurra tíma langt ferðalag kjúklingsins. Hann sagði að á KFC-stöðum sínum væri kjúklingnum hent eftir hálftíma.