Draugur á krá í Devon

Svo virðist sem draugur sé fastagestur á rugbybar í Devon. Myndir hafa náðst af bjöllu sem hringir og finnast engar skýringar á því aðrar en draugagangur.

Starfsfólk Exmouth Rugby Club-barsins í Devon á Englandi er ekki í nokkrum vafa um að draugagangurinn sé raunverulegur og meira að segja telja þau víst að draugurinn sé Nigel nokkur Harris, vinsæll fastagestur staðarins til 30 ára, sem nýlega lést; að hann hringi bjöllunni sem boðar lokun og síðasta drykk.

Atvikið náðist meira að segja á vídeóvél, en þá hringir bjallan og enginn er nærri. Tasmyn Burns, 19 ára gömul barþerna, sá þegar bjallan hringdi af miklu afli. Hún sagði að öllum hafi brugðið mjög í brún. Hún hélt fyrst að þetta væri eitthvað grín en svo var engan að sjá. „Ég er ekki trúuð á drauga en það er erfitt eftir þetta atvik. Og svo heyrði ég fólk tala um að þetta væri örugglega andi Nigels," segir Tasmyn.