Segir kínverska ferðamenn til skammar fyrir Kína

Wang Yang, aðstoðarforsætisráðherra Kína, segir „ósiðlega hegðun" kínverja á ferðum sínum erlendis eyðileggja ímynd landsins.

Þetta sagði Yang á fundi þar sem ný ferðamannalöggjöf var rædd samkvæmt kínverska fréttamiðlinum Shanghaiist. Hann nefndi sérstaklega hegðun á borð við þá að tala hátt á almannafæri, fara yfir á rauðu ljósi og að hrækja á gangstéttir, en hann telur kínverska ferðamenn koma óorði á Kína með þessu.

Það að hrækja er algengt víðsvegar um Kína og margir eldri kínverjar líta ekki á að það sé dónalegt eða ófágað að hrækja. Fyrir Ólympíuleikana 2008 voru gerðar tilraunir til að fá fá kínverja til að láta af þessari hegðun, en sérstök hrákalöggjöf hefur verið í gildi í landinu frá 9. áratugnum.

Þá hefur hegðun kínverja frá meginlandinu farið fyrir brjóstið á íbúum Hong-Kong, en íbúar borgríkisins telja hegðun þeirra á meginlandinu vera mjög dónalega þrátt fyrir það að fjöldi fólks á meginlandinu hafi efnast á seinustu árum.

Sömu sögu segja margir í Indónesíu sem taka við kínverskum ferðamönnum. Þeir eru sagðir sérstaklega háværir og frekir í framkomu. Kínverskum ferðamönnum hefur fjölgað um allan heim í kjölfar þess að íbúar landsins hafa margir hverjir efnast á seinustu árum.