Ævilangt bann fyrir ólæti

Newcastle ætlar að taka harkalega á þeim stuðningsmönnum knattspyrnuliðs borgarinnar sem höfðu sig mest í frammi í óeirðum í miðbæ Newcastle í gær.

Newcastle tapaði 3-0 á heimavelli gegn erkifjendum sínum og grönnum frá Sunderland. Allt ætlaði um koll að keyra í miðborg Newcastle eftir leikinn líkt og fjallað var um á Vísi í morgun.

Í yfirlýsingu sem Newcastle hefur sent frá sér segir að félagið skammist sín fyrir „svokallaða stuðningsmenn félagsins". Félagið muni vinna með lögreglu að rannsókn málsins og þeir seku fái lífstíðarbann frá leikjum liðsins.

29 voru handteknir í óeirðunum í gær og fjórir lögreglumenn slösuðust.