Ánægð með nýja andlitið sitt

Aisha Mohammadzai varð nítján ára gömul að táknmynd kúgaðra kvenna í Afganistan. Þá sagði hún dagblaðinu Time sögu sína en forsíðumyndin vakti óskipta athygli.

Eiginmaður Aishu skar af henni nef og eyru eftir að hún hafði reynt að flýja heimili þeirra. Þar mátti hún sæta ofbeldi af hendi eiginmannsins og fjölskyldu hans þannig að hún sá sér kostinn vænstan að flýja.

Þremur árum síðar býr hin 21 ára Afgani hjá fósturfjölskyldu í Maryland-fylki í Bandaríkjunum. Hún hefur gengist undir fjölmargar lýtaraðgerðir vestanhafs og sagði sjónvarpsþættinum ITV Daybreak sögu sína á dögunum.

„Ég er svo ánægð með nýja andlitið mitt," segir Aisha í viðtalinu við ITV. Hún á enn eftir að gangast undir nokkrar aðgerðir til viðbótar til þess að gera nýja nefið eins fínt og mögulegt er. Þá fyrst verður hægt að snúa sér að eyrunum.

Refsað fyrir að flýja

Aisha var neydd í hjónaband aðeins tólf ára gömul. Faðir hennar stóð í skuld við fjölskyldu væntanlegs eiginmanns sem var ástæða þess að hjónabandið varð að veruleika.

„Ég var misnotuð af eiginmanni mínum og fjölskyldu hans. Mig dreymdi um að flýja á hverjum degi og einn daginn gat ég þetta ekki lengur. Ég flúði," segir Aisha í viðtalinu.

Hún var handtekin, færð í fangelsi og þvínæst send tilbaka til eiginmannsins ofbeldisfulla. Sem refsingu við flóttanum fór hann með hana upp í fjöllin. Nokkrir félagar eiginmannsins héldu henni á meðan eiginmaðurinn skar af henni nefið, eyrun og hárið. Þar var hún skilin eftir og látin bíða dauða síns. Hún komst þó sem betur fer á herstöð Bandaríkjanna þar sem hún fékk hjálp.

Vill gefa fólki von

Aisha segist í viðtalinu við ITV vonast til þess að saga hennar verði saga vonar.

„Ég vil koma þeim skilaboðum til allra kvenna sem sæta ofbeldis af hálfu eiginmanna sinna að sýna styrk. Þær mega alls ekki gefast upp," segir Aisha.

Nánar á vef Verdens Gang.