Tölva sögð hafa búið til umdeildan nauðgunarbol

Bolaframleiðandinn Solid Gold Bomb hefur beðist afsökunar á stuttermabol frá fyrirtækinu sem var til sölu á vefversluninni Amazon.

Umræddur bolur var með áletruninni „Keep calm and rape a lot", sem á íslensku útleggst sem „Haltu ró þinni og nauðgaðu mikið".

Notendur vefsins flykktust inn á sölusíðu bolsins og lýstu vanþóknun sinni. Var bolurinn sagður viðurstyggilegur og verslunin hvött til þess að taka hann úr sölu.

Talsmaður Amazon UK sagði í viðtali við fréttastofu Sky að bolurinn væri ekki lengur í sölu, en þrátt fyrir það eru enn bolir í sölu frá sama fyrirtæki sem hvetja til kynbundins ofbeldis. Meðal þeirra sem enn eru í sölu er einn sem segir „Haltu ró þinni og sláðu hana", og á öðrum stendur „Haltu ró þinni og stingdu hana". Frasarnir eru byggðir á áróðursfrasanum „Keep calm and carry on", sem notaður var í seinna stríði.

Framleiðandi bolanna, fyrirtækið Solid Gold Bomb, segist harma að bolurinn hafi verið settur í sölu. Í yfirlýsingu á vefsíðu fyrirtækisins segir að tölvuforrit sem „búi til samsetningar úr þúsundum orða" hafi búið bolinn til.