Risastórt tap fyrir Svíum

Stelpurnar okkur máttu þola slæman skell gegn Svíþjóð á Algarve-mótinu í Portúgal. Lokatölur voru 6-1, Svíum í vil.

Þetta er langstærsta tap íslenska kvennalandsliðsins í langan tíma en staðan í hálfleik var 4-0.

Kosovare Asilani, Sara Thunebro, Lotta Schelin og Marie Hammarström skoruðu mörk Svía í fyrri hálfleik. Asslani og Susanne Moberg bættu hinum tveimur við og var staðan orðin 6-0 eftir 65 mínútur.

Hólmfríður Magnúsdóttir náði að klóra í bakkann fyrir íslenska liðið er hún skallaði fyrirgjöf Eddu Garðarsdóttur úr hornspyrnu í markið.

Svíar hefðu getað skorað fleiri mörk í kvöld en Þóra Björg Helgadóttir kom í veg fyrir það með ágætum tilþrifum í markinu.

Fanndís Friðriksdóttir fékk einnig gott færi að skora undir lok leiksins er hún slapp ein inn fyrir en hún skaut í slá.

Ísland tapaði fyrir Bandaríkjunum, 3-0, á miðvikudaginn og er því enn stigalaust í riðlinum. Ísland mætir Kína í lokaleik sínum í B-riðli á miðvikudaginn. Kína er með eitt stig eftir tvo leiki og þetta er því úrslitaleikur um þriðja sæti riðilsins.

Það lið sem endar í þriðja sæti riðilsins spilar um fimmta sætið á mótinu.