Hundrað svipuhögg eftir nauðgun

Fimmtán ára gömul stúlka á Maldíveyjum í Indlandshafi hefur verið dæmd til að þola hundrað svipuhögg eftir að hafa viðurkennt við yfirheyrslur í nauðgunarmáli að hafa stundað kynlíf. Refsingin hljóðar einnig upp á átta mánaða stofufangelsi. Fréttastofa Sky greinir frá.

Faðir stúlkunnar liggur undir grun um að hafa nauðgað henni og myrt barn sem hún eignaðist í kjölfar nauðgunarinnar. Á hann yfir höfði sér 25 ára fangelsi.

Við yfirheyrslur viðurkenndi stúlkan að hafa stundað kynlíf með manni, sem ekki hefur verið nafngreindur, en kynlíf utan hjónabands er bannað með lögum á Maldíveyjum.

Dómnum verður framfylgt þegar stúlkan verður átján ára en Sameinuðu þjóðirnar og mannréttindasamtökin Amnesty International hafa fordæmt dóminn.

Þá hefur ríkisstjórn Maldíveyja hvatt dómstóla til þess að sýna stúlkunni miskunn í ljósi þess að hún sé í áfalli eftir nauðgunina.

Í september 2012 var sextán ára stúlka frá Maldíveyjum dæmt til að þola svipuhögg eftir að hafa viðurkennt kynlíf utan hjónabands, en kynlífsfélagi hennar var dæmdur til tíu ára fangelsisvistar.