NEC vann góðan útisigur á Utrecht

Guðlaugur Victor Pálsson lék allan leikinn fyrir NEC Nijmegen sem vann góðan sigur á Utrecht 3-0 á útivelli í dag. Guðlaugur Victor lék allan leikinn að vanda fyrir NEC.

Utrecht hafði unnið fjóra leiki í röð fyrir leikinn í dag en NEC er í feiknaformi og vann sinn þriðja sigur í röð.

Guðlaugur Victor var að vanda á miðjunni hjá NEC og lét mikið til sín taka. Hann fékk að líta gula spjaldið á 52. mínútu.

Melvin Platje skoraði fyrsta mark leiksins á 15. mínútu. Miðjumaðurinn Erik Falkenburg skoraði annað markið fimm mínútum fyrir leikslok og þegar þrjár mínútur voru komnar fram yfir hefðbundinn leiktíma setti varamaðurinn Ruud Boymans þriðja markið og gerði endanlega út um leikinn.

NEC er í 7. sæti deildarinnar með 33 stig, sex stigum á eftir Utrecht í sætinu fyrir ofan.