Laus úr haldi mannræningjans

Fimm ára dreng, sem verið hefur í haldi mannræningja í neðanjarðarbyrgi í Alabama-fylki í Bandaríkjunum síðastliðna viku, var í kvöld bjargað úr prísund sinni.

Samkvæmt frétt bandaríska fjölmiðilsins CNN er líðan drengsins góð. Liðsmenn Alríkislögreglunnar (FBI) réðust til atlögu í dag þegar þeir töldu lífi drengsins ógnað en viðræður við mannræningjann höfðu þá runnið út í sandinn.

Mannræninginn, Jimmy Lee Dykes, réðst um borð í skólabíl í bænum Midland í Alabama þriðjudaginn 29. janúar. Dykes skaut bílstjórann til bana og þá nam hann fimm ára dreng á brott. Enn hafa ekki fengist neinar skýringar á því hvers vegna umræddur drengur var tekinn en engin tengsl hafa fundist milli fjölskyldu hans og mannræningjans.