"Ólýsanlegt að faðma hann á ný“

Líðan fimm ára gamla drengsins, sem bjargað var úr klóm mannræningja í gær eftir vikudvöl í neðanjarðarbyrgi í Alabama-fylki í Bandaríkjunum, er góð að því er AP-fréttastofan hefur eftir fjölskyldumeðlimum.

Eftir vikudvöl í neðanjarðarbyrginu, sem var á stærð við skáp, hagaði drengurinn sér eðlilega ef marka má yfirlýsingu fjölskyldu hans og fógetans í Dale sýslui. Drengurinn hljóp um í dag, lék sér með risaeðluleikföng, gæddi sér á kalkúnasamloku ásamt því að glápa á sjónvarpsþættina um Svamp Sveinsson.

„Við erum búin að ganga úr skugga um að ekkert ami að honum líkamlega. Við vitum þó ekki hvaða áhrif þetta hefur haft á hann andlega," segir amma drengsins við AP-fréttastofuna. Hún sagðist óttast að drengurinn, sem verður sex ára á morgun, verði alla sína ævi að jafna sig á atburðinum.

Alríkislögreglan kemdi jörð mannræningjans Jimmy Lee Dykes í dag en Dykes var drepinn í björgunaraðgerðunum í gær. Lítið hefur verið gefið upp um aðgerðir lögreglunnar vikuna sem drengurinn var í haldi. Svo var það alla vikuna og er enn.

Þó er ljóst að lögreglumennirnir komu mat, lyfjum og fleiru til drengsins í byrginu. Rennandi vatn, hita og kapalsjónvar var að finna í byrginu sem var í anda þeirra sem notuð eru í tilfelli fellibylja.

Amma drengsins staðfesti ennfremur að fjölskyldan vissi lítið um atburði liðnnar viku þar sem rannsókn Alríkislögreglunnar standi enn yfir. Í yfirlýsingu sem móðir drengsins sendi frá sér í dag færir hún lögregluyfirvöldum þakkir fyrir að hafa skilað syni sínum heim.

„Í fyrsta skipti í næstum því viku þá vaknaði ég í morgun við fallegustu mögulegu sýn. Yndislega drenginn minn. Ég get ekki lýst tilfinningunni að geta faðmað hann á ný."

Yfirvöld segja komið hafa í ljós í gær fyrir víst að Dykes væri vopnaður í byrginu. Orðið hafi vart við breytingar í hegðun hans og viðræður lögreglunnar við hann fóru út um þúfur. Því réðst lögreglan inn í byrgið, bjargaði drengnum og drap Dykes.