Sjakalinn fær ekki reynslulausn

Franskur dómstóll hefur hafnað beiðni launmorðingjans Carlos sjakala um lausn úr fangelsi en hann var dæmdur í lífstíðarfangelsi fyrir fjórar mannskæðar sprengjuárásir í Frakklandi á 9. áratugnum.

Carlos, sem heitir réttu nafni Ilich Ramirez Sanchez, var handtekinn í Súdan árið 1994. Tvær árásanna framdi hann árið 1982 og tvær til viðbótar ári síðar. Samtals týndu 11 manns lífi í árásunum, en hann fékk einnig lífstíðardóm fyrir þrjú morð sem hann framdi árið 1975.

Sjálfur sagði hann í samtali við dagblaðið El Nacional árið 2011 að hann hefði staðið á bak við fleiri en 100 árásir sem hefðu kostað allt 2.000 manns lífið.