Gríska ríkið lokar ríkissjónvarpinu

Gríska ríkisstjórnin hefur ákveðið að loka fyrir útsendingar í sjónvarpi og útvarpi hjá ríkisfjölmiðlinum ERT. Talsmaður ríkisstjórnarinnar segir að mögulega verði slökkt á útsendingum strax á morgun. Allir starfsmennirnir, 2500 að tölu verða settir í launalaust leyfi en til stendur að opna á ný eins fljótt og mögulegt er.

Þetta er nýjasta útspil ríkisstjórnarinnar sem reynir nú að skera niður útgjöld á sem flestum sviðum í því augnamiði að ná landinu upp úr djúpri kreppu. Ríkisstöðin hefur verið gagnrýnd harðlega fyrir bruðl og óhóflegan kostnað auk þess sem gagnsæi stofnunarinnar sé verulega ábótavant.