Frí flatbaka fyrir brjóstagjöf

Jackie Johnson-Smith var komið skemmtilega á óvart á pizzastað í Iowa-fylki Bandaríkjanna á dögunum. Þegar reikningurinn kom fyrir matnum hafði þjónustustúlkan borgað fyrir eina pizzuna, og allt vegna þess að Johnson-Smith hafði gefið barni sínu brjóst inni á staðnum.

„Ég keypti eina pizzuna. Þakkaðu eiginkonu þinni fyrir brjóstagjöfina,“ skrifaði þjónustustúlkan á reikning eiginmanns Johnson-Smith, en hún birti ljósmynd á reikningnum á Facebook-síðu sinni.

„Ég hef verið með þrjú börn á brjósti og oft lent í því að gónt er á mig þegar ég hef gefið þeim á almannafæri. En kvöldið í kvöld bætir upp fyrir það allt saman,“ skrifaði hún, og bætti því við að hún hefði verið orðlaus þegar reikningurinn kom.

Samkvæmt fréttastofu KCCI 8 í Des Moines heitir þjónustustúlkan Bodi Kinney, og sagði hún í viðtali við stöðina að samstöðu þyrfti þegar kæmi að brjóstagjöf.