Heyrði maðkana éta sig að innan

Rochelle Harris, bresk kona sem hafði verið í sumarfríi í Perú, fór til læknis vegna óhljóða sem henni heyrðust koma úr höfði sínu.

Í fríinu minnist hún þess að hafa fjarlægt flugu úr eyra sínu en hún hugsaði ekki nánar út í það fyrr en í ljós kom að fjöldi maðka höfðu komið sér fyrir djúpt inni í eyra hennar. Voru þeir skýringin á hljóðunum, sem og höfuðverkjum sem hún hafði fengið eftir ferðina.

„Ég var mjög hrædd,“ sagði Harris í heimildarþættinum Bugs, Bites and Parasites, sem sýndur verður á Discovery-sjónvarpsstöðinni á sunnudaginn. „Voru þeir inni í heilanum á mér?“

Læknarnir reyndu fyrst að skola maðkana úr eyra Harris með ólífuolíu án árangurs. „Þetta voru lengstu klukkustundir lífs míns þegar ég beið. Ég fann enn fyrir þeim og heyrði í þeim, og að vita hvers vegna hljóðin komu gerði þetta allt miklu verra.“

Að lokum neyddust læknarnir til að skera maðkana úr eyranu, en þeir voru átta talsins og veltu læknarnir því fyrir sér hvort þeir hefðu getað étið sig inn að heila. Rannsóknir leiddu í ljós að sérstök tegund snigilflugu (Cochliomyia) hafði verpt í eyra konunnar.