Innlent

Sýknudómi yfir Styrmi Þór áfrýjað til Hæstaréttar

Styrmir Þór Bragason, fyrrum forstjóri MP banka, ræðir við fréttamenn eftir sýknudóminn í héraðsdómi.
Styrmir Þór Bragason, fyrrum forstjóri MP banka, ræðir við fréttamenn eftir sýknudóminn í héraðsdómi. Mynd/Stefán Karlsson
Ríkissaksóknari hefur áfrýjað sýknudómi yfir Styrmi Þór Bragasyni, fyrrum forstjóra MP banka, til Hæstaréttar en áfrýjunarfrestur í málinu rennur út á fimmtudag. Þetta staðfestir Sigríður Friðjónsdóttir, ríkissaksóknari í samtali við fréttastofu.

Styrmir Þór var ákærður fyrir svokallaða Exeter-fléttu. Hæstiréttur tekur málið til efnislegrar meðferðar á næstu vikum. Eftir sýknudóminn í byrjun mánaðarins sagði Styrmir Þór við fréttamenn að hann hefði aldrei skilið ákæruna og niðurstaða dómara héraðsdóms hafi verið í takt við það sem hann bjóst við. Þrjú og hálft ár af hans lífi hafi farið í þetta mál.

Málið snerist um 1100 milljóna króna lán sem Byr veitti Exeter Holding á seinni hluta ársins 2008. Lánið var notað til þess að kaupa stofnfjárbréf af MP banka og tveimur stjórnarmönnum Byrs á yfirverði.

Tveir menn, þeir Jón Þorsteinn Jónsson og Ragnar Z. Guðjónsson, höfðu áður hlotið fjögurra og hálfs árs fangelsisdóm fyrir sinn þátt í málinu.


Tengdar fréttir

Dómsuppsaga í máli Styrmis í dag

Dómsuppsaga er í dag í máli sérstaks saksóknara gegn Styrmi Þór Bragasyni, fyrrverandi forstjóra MP banka. Styrmir var ákærður fyrir hlutdeild í umboðssvikum og peningaþvætti að auki, í tengslum við hið svokallaða Exeter-mál. Hæstiréttur hefur þegar dæmt Ragnar Z. Guðjónsson, fyrrverandi forstjóra Byrs sparisjóðs, og Jón Þorstein Jónsson, fyrrverandi stjórnarformann Byrs, í fjögurra og hálfs árs fangelsi fyrr þeirra þátt í málinu. Máli Styrmis var vísað aftur í hérað, en hann var líkt og Ragnar og Jón Þorsteinn, sýknaður í héraði í upphafi.

Ekki búið að ákveða hvort sýknudómi verði áfrýjað

Ríkissaksóknari hefur ekki tekið ákvörðun um það hvort að sýknudómi yfir Styrmi Þór Bragasyni, fyrrum forstjóra MP banka, verði áfrýjað til Hæstaréttar. Áfrýjunarfrestur í málinu rennur út 28. febrúar næstkomandi.

Styrmir Bragason: Hef aldrei skilið þessa ákæru gegn mér

Styrmir Þór Bragason, fyrrverandi forstjóri MP banka, var sýknaður í dag í Exeter-málinu. Hann sagði þegar hann gekk út úr dómsal 201 í Héraðsdómi Reykjavíkur, þar sem dómurinn var kveðinn upp, að hann hefði aldrei skilið hvers vegna hann væri ákærður í málinu, og vonaðist til þess að málinu fari að ljúka sem fyrst, en það hefur verið til meðferðar í dómskerfinu í þrjú og hálft ár.

Mest lesið


Fleiri fréttir

Sjá meira


×

Mest lesið